Ndahet nga jeta kompozitori i këngës “Fëmija i parë”, fitues i çmimit të 1, në festivalin e I-rë, në RTSH.
Lajmin e bën me dije studiuesi Vasil Tole i cili shkruan se Abdulla Grimci, i fundit i plejadës së parë të kompozitorëve shqiptarë të pas Luftës së II -të Botërore, u nda nga jeta në moshën 99 vjeçare në Itali, sot më dt. 5 mars 2018, në orën 10:50, në Ascoli Piceno. Aty maestro Grimci banonte prej vitit 1992, bashkë me djalin e tij Petrit Grimci dhe me nipin Rubin dhe mbesën Klementina Grimci.
Do të kujtohet ndër të tjera si themelues i festivalit të këngës në RTSH-1962, si fitues i ćmimit të parë me këngën “Fëmija i parë”, e po ashtu si udhëheqës artistik e drejtues institucionesh e ansamblesh muzikore në qytete të ndryshme të Shqipërisë.
E padyshim do të kujtohet e respektohet për krijimtarinë muzikore që përfshin pothuajse gjithë gjinitë muzikore, nga kënga deri tek opera e simfonia.
I jemi mirënjohës këtij muziktari të rrallë që i dha shumë kulturës e artit tonë. Ngushëllime familjes dhe komunitetit të muziktarëve. Përcjellja në banesën e fundit do të bëhet nesër pasdite, njofton Vasil Tole.
Abdulla Grimci lindi në Shkodër më 2 korrik 1919.