Çështja e lobimit me para ruse e Partisë Demokratike përplasi kryeministrin Edi Rama dhe kryedemokratin Lulzim Basha, në seancën parlamentare. Kryeministri Rama e cilësoi atë gropën e fundit të Bashës, ndërsa shtoi se ai vetë nuk ja ka hapur gropën partisë së tij. Por Basha e sfidoi kryeministrin me një hetim parlamentar.
Përtej debatit për Rrugën e Kombit, kryeministri Edi Rama dhe kryetari i opozitës Lulzim Basha u përplasën për çështjen e kontratave të lobimit dhe financimin rus. Basha nuk e përmendi me emër por lëshoi një akuzë të fortë për një nga Ministrat e qeverisë Rama.
Basha: Nëse prokuroria nuk do të ishte e kontrolluar nga ty sot duhet të kishte hapur hetimin për një Ministrin tënd që krekoset aty, i cili ka nisur banditë në emër të Juremeksit dhe Rusisë një investitori shqiptaro-amerikan. Unë i bëj thirrje prokurorisë të nisë hetimin.
Nga ana tjetër, Rama tha se me çështjen e lobimit Basha, ka hapur një gropë ku mund të bie vetë.
Rama: Nuk i kam hapur as vendit tim, as partisë sime një gropë si kjo e fundit që i ka hapur zotërote partisë tënde. Saliu nuk ka lidhje me atë historinë e xhepave të errët të oligarkëve rusë.
Kryetari i opozitës u shpreh i gatshëm që për këtë çështje të bëhet një hetim parlamentar, ndërsa një akuzë të dytë, këtë herë për bashkëshorten e kryeministrit.
Basha: Unë jam i hapur të bëjmë një hetim parlamentar që pastaj ta çojmë në prokurori.
Kryeministri Edi Rama dhe kryetari i opozitës Lulzim Basha nuk i shmangën akuzat personale.
Rama: Ju jetoni fuizikisht por jo shpirtërisht, mendësisht me këtë qytetërim. Kurse ne jetojmë dhe shpirtërisht dhe mendësisht.
Basha: Partia e këllirës na akuzoni ne se nuk paskemi estetikën ta kuptojmë dhe ta pranojmë.Kush more, partia e profesorëve, doktorëve, pedagogëve apo llumi i trafikantëve dhe përdhuesve me të cilët mbushe grupin tënd parlamentar dhe bashkitë?
Për më shumë se 1 orë e 30 minuta debat, Rama e përsëriti disa herë se e ka mik Lulzim Bashën, por në fund mori këtë përgjigje:
Basha: Nuk jam unë miku yt. Miqtë e tu janë Shullazi, Habilajt, Disa të kanë ikur nga kjo sallë. Këta janë miqtë e tu.
Debati u mbyll kur Kryeministri iku nga parlamenti.