Në stadiumin “Loro Boriçi” të Shkodrës do të luhet pasditen e sotme ndeshja e parë e turit të dytë të Ligës së Kampioneve mes Kukësit dhe Qarabagut.
Pasi eliminuan me mjaft vështirësi maltezët e Vallettës, kuksianët e drejtuar nga Armando Cungu do të synojnë “mrekullinë” ndaj skuadrës nga Azerbajxhani, në të cilën luan edhe kapiteni i Kombëtares shqiptare, Ansi Agolli.
Do të jetë një mision i vështirë, por jo i pamundur për verilindorët, të cilët duan të shkruajnë historinë në Champions.
Kjo sfidë do të luhet në orën 19:00 dhe tashmë të dy trajnerët i kanë publikuar formacionet zyrtare.
Tekniku shkodran do ta nisë takimin me 5 mbrojtës, duke shfrytëzuar kundërsulmet.
Donjet Shkodra është titullari i sakrifikuar, i cili përfundoi në stol.
Nga ana tjetër, Qarabagu ka vendosur të aktivizojë nga minuta e parë mbrojtësin shqiptar Ansi Agolli.
Formacionet
Kukësi: Frashëri, Shameti, Alla, Qaqi, Maliqi, Rumbullaku, Musolli, Dzaria, Çyrbja, Melo, Plaku
Qarabagu: Vagner, Garajev, Medvev, Hysenov, Sadigov, Agolli, Slavçev, Ozobiç, Mishel, Guerrier, Madatov