Një masakër e vërtetë ka ndodhur në fshatin Resulaj të Vlorës, ku 8 persona janë vrarë me armë zjarri.
Një 24 vjeçar i cili mendohet se është me probleme mendore ka vrarë 8 persona të gjithe nga i njëjti fis me mbiemër Zykaj.
Edhe autori eshte nga ai fis.
Ngjarja u raportua rreth orës 18:10 minuta të pasdites së sotme (10 gusht).
Policia e Vlorës konfirmon se autori i ngjarjes është 24 vjeçari, Ridvan Zyka, i cili dyshohet se i ka vrarë viktimat me armë zjarri automatike.
I riu dyshohet të jetë me të meta mendore.
Gazetarja e Ora News në Vlorë, Jerola Ziaj thotë se 6 persona të tjerë kanë mbetur të plagosur nga ngjarja.
“Një 24 vjeçar ka shtënë në drejtim të familjarëve të tij, pjesëtarë të fisit Zykaj duke lënë pas 8 viktima. Delta Force RENEA dhe efektivë të policisë së Vlorës janë vënë në ndjekje të 24 vjeçarit që dyshohet se është me të meta mendore, por ende nuk është konfirmuar. Blutë e Vlorës po krehin territorin për të arrestuar të riun që mendohet se është ende i armatosur”, raporton gazetarja e Ora News Jerola Ziaj.
Autori ka lidhje farefisnore të brezit të dytë me viktimat.
Viktimat janë kushërinj të parë dhe vëllezër me njëri-tjetrin.
Policia ka shkuar në vendin e krimit dhe ka nisur puna për arrestimin e tij, ndërsa në aksion janë angazhuar forcat e policisë së Vlorës, RENEA, FNSH dhe Delta.
Kontrolle të shumta po zhvillohen në zonë nga toka dhe nga ajri.
Autori i ngjarjes dyshohet të jetë ende i armatosur, çka mund të përbëjë rrezik për forcat e rendit.
Të plagosurit janë dërguar në spitalin e Vlorës ndërsa viktimat janë dërguar në morgun e qytetit.
Njoftimi i Policisë:
Më datë 10.08.2018, në fshatin Resulaj, Selenicë, shtetasi Ridvan Zykaj, 24 vjeç, për motive ende të paqarta ka vrarë me armë zjarri 8 persona nga dy familje te fisit Zykaj.
Autori pas krimit është larguar ku forca të shumta të Policisë, RENEA, Delta Forcë, Fnsh, dhe forcat e Drejtorisë Vendore të Policisë Vlorë janë vënë në ndjekje dhe po krehin zonën për të bërë të mundur kapjen e tij.
Grupi hetimor nën drejtimin e Prokurorit ndodhet në vendngjarje dhe po punon për zbardhjen e plotë të rrethanave të ngjarjes.