Kryeministri Edi Rama sfidoi të gjitha portalet duke deklaruar se do të gjobiten të gjitha ato që do të publikojnë lajme të rreme.
Shefi i ekzekutivit po ashtu tha se ligji për antishpifjen parashikon edhe ndëshkim për ata që kopjojnë lajmet.
Rama: Ne do të rrisim gjobën për lajmet e rreme dhe për shpifjen sic unë e quaj me një fjalë të vetme dhe besoj që është mëse e mjaftueshme për të krijuar një situatë më të shëndetshme.
Ashtu sikundër është e domosdoshme të garantojmë të drejtën e autorit. Të garantojmë që të gjitha mediat që prodhojnë të jenë të mbrojtura nga ligji dhe të mos e shohin veten të konkurruara në mënyrë të pandershme në sekondën e parë që nxjerrin një prodhim të tyre në rrjetet online, pasi ai prodhim merret dhe shumëfishohet në pafundësi. Tek shumëfishimi në pafundësi do të ndërhyjmë për të ndëshkuar përhapsin e shpifjes. Që do të thotë se nëse një media është përgjegjëse për një lajm të rremë, cilido që e merr dhe e replikon është po aq përgjegjës sa media e origjinës.
Po ashtu Rama tha se do të krijohet një bazë të dhënash, ku do të regjistrohen të gjitha portalet.
Rama: Do të krijojmë një bazë të re të dhënash kombëtare, ku do të regjistrohen të gjitha portalet që operojnë në Shqipëri duke shmangur maksimalisht historitë e fantazmave që deri më sot operojnë pa asnjë kontroll në territorin e Shqipërisë.
Deklaratat e Ramës u bënë gjatë një darkë pune me pjesëmarrësit e konferencës së agjencive të lajmeve europiane dhe ballkanike me temë :“News Agencies vs Fake News”.