Viktor Kçira lindi në Shkodër më 18 prill të vitit 1944 dhe angazhohet shpejt me sportin duke zgjedhur basketbollin si më të preferuarin e tij. Luan me të rinjtë e Vllaznisë dhe më pas, kalon me studime në Tiranë por baskebtollin e vazhdon, duke luajtur këtë herë me ekipin e Dinamos.
Rikthehet sërish në Shkodër dhe luan me Vllazninë deri në fund të viteve ’70. Pas lënies së sportit, Kçira do të niste punën si trajner, duke drejtuar ekipin e basketbollit të të rejave por edhe të rriturave të Vllaznisë ndërsa në vitet ’80 do ta gjejmë edhe si trajner i volejbollit ndërkohë që do të rikthehej sërish në krye të ekipit të basketbollit të të rriturave në vitin 1986.
E drejton atë deri në vitin 1988 duke fituar në këtë vit edhe trofeun e Kupës së Shqipërisë. Më pas do të emërohej në postin e shefit të Klubit Vllaznia për një periudhë të shkurtër.
Viktor Kçira mbetet një figurë e rëndësishme e sportit shkodran për të cilin ka dhënë kontributin e tij për gati 30 vite me rradhë.Ceremonia e varrimit të këtij personazhi të rëndësishëm të sportit shkodran do të zhvillohet sot në orën 16.00.
Gazeta “Shkodra Sport” i shpreh ngushëllimet më të sinqerta familjes Kçira për humbjen e njeriut të saj të dashur, por edhe komunitetit të basketbollit dhe volejbollit shkodran për humbjen e kolegut dhe trajnerit të tyre.
I përjetshëm qoftë kujtim yt Viktor Kçira!
@ShokodraSport