Dogana shqiptare ka marrë vlerësim pozitiv nga CEFTA për programin e operatorëve ekonomik të autorizuar pasi i ka plotësuar të gjitha standardet e protokollit përkatës.
Drejtori i përgjithshëm i doganave tha se kjo do të sjellë lehtësi të madhe për operatorët duke rritur shkëmbimet tregtare mes vendeve.
“Gjatë vitit 2021 kemi marrë aplikimet e para dhe kemi miratuar statusin për 8 Operatorë të Autorizuar Ekonomikë, kryesisht nga bizneset më të konsoliduara dhe më korrekt në marrëdhënien me Administratën Doganore. Interesi i 9 operatorëve të tjerë për të përfituar statusin e Operatorëve Ekonomike të Autorizuar është tregues i rritjes së besimit te administrata doganore dhe faktit se avantazhet e AEO janë efikase”, tha Gazheli.
Shqipëria, Maqedonia e Veriut dhe Serbia kanë tashmë marrëveshjet bilaterale të njohjes reciproke të AEO në kuadër të nismës “Ballkani Hapur” dhe i njëjti tekst i marrëveshjes është negociuar në nivel teknik edhe me Kosovën.
