Tuesday, October 4, 2022
HomePolitikëInvestigimi i BIRN: Si po i përdorin Rama dhe ministrat fondet publike...

Investigimi i BIRN: Si po i përdorin Rama dhe ministrat fondet publike dhe nëpunësit për të rritur rrjetet e tyre sociale private

-

Kryeministri Edi Rama dhe ministrat e kabinetit të tij po përdorin fondet publike dhe një rrjet të gjerë nëpunësish të marrëdhënieve publike për të avantazhuar llogaritë e tyre private në rrjetet sociale në dëm të faqeve zyrtare të institucioneve.

Kryeministri Edi Rama e nis ditën çdo mëngjes rreth orës 8:00 në faqen e tij në Facebook me postim fotosh ose videosh optimiste, kryesisht copëza projektesh infrastrukturore nga çdo cep i Shqipërisë.

Faqja private e Ramës është kthyer në mediumin kryesor të komunikimit të qeverisë me publikun; ajo ka 1.6 milionë ndjekës, bën 6-7 postime në ditë dhe merr qindra komente e mijëra pëlqime në secilin prej tyre.

Në të njëjtën platformë funksionon prej vitit 2013 edhe faqja zyrtare e qeverisë shqiptare, Kryeministria, por ajo vuan mungesën e popullaritetit. Me vetëm 3500 ndjekës, Kryeministria ka ndërveprime minimale dhe ndikim të papërfillshëm në publik.

Rama nuk është i vetmi anëtar i kabinetit që e ka përqendruar komunikimin qeveritar me publikun në kanalet e tij private dixhitale. Shumica e ministrave të tij ndjekin gjithashtu të njëjtin model; ata kanë më shumë ndjekës dhe përmbajtje në faqet e tyre personale se sa në ato të institucioneve që drejtojnë.

Mediat sociale janë një avantazh i fuqishëm politik në zgjedhje dhe në qeverisje, por për të qenë vërtet të tilla, ato kanë nevojë për përmbajtje të vazhdueshme.

Të dhënat e siguruara përmes një kërkese për të drejtë informimi tregojnë se kryeministri Rama dhe ministrat e tij po përdorin fondet publike dhe një rrjet të gjerë nëpunësish të marrëdhënieve me publikun për të prodhuar përmbajtje dhe avancuar mediat e tyre sociale në dëm të kanaleve zyrtare të institucioneve që ata drejtojnë.

Duke analizuar të dhënat e mbledhura nga Crowdtangle, një aplikacion i gjigantit të medias sociale, Facebook, BIRN zbuloi gjithashtu se faqet personale të Ramës dhe ministrave të tij ushqehen me shumë më tepër postime, video dhe transmetime live sesa faqet e institucioneve, duke arritur një raport 98 me 2 për qind të ndërveprimeve totale në favor të tyre.

Menaxhimi i kanaleve dixhitale të komunikimit të kryeministrit, ministrave, kryeministrisë dhe ministrive është përgjegjësi e Agjencisë për Media dhe Informim, MIA – një institucion i ri i ngritur një vit më parë nga kryeministri Edi Rama dhe i drejtuar nga zëdhënësi i tij, Endri Fuga.

Edhe pse komunikimi i qeverisë përmes rrjeteve sociale nuk është i rregulluar ligjërisht, përfaqësues të shoqërisë civile thonë se strategjia e PR-it të anëtarëve të kabinetit “Rama” është duke i përdorur fondet publike për avantazhe politike.

“Profilet politike të ministrave suportohen me para reklamash nga buxheti i shtetit në funksion të detyrave shtetërore dhe më pas i përdorin si arsenal në fushatë zgjedhore për të mbështetur forcën e tyre politike,” tha Rigerls Xhemollari nga “Qëndresa Qytetare”.

Drejtori i Agjencisë për Media dhe Informim, Endri Fuga i tha BIRN se menaxhimi i përmbajtjes për mediat sociale të Ramës dhe ministrave i shërben informimit të publikut dhe mohoi që në këtë rast të kishte abuzim me funksionin publik.

“Nëpunësit e Agjencisë për Media dhe Informim, përfshirë zëdhënësit e Ministrive, janë të angazhuar për prodhimin e përmbajtjes online që lidhet vetëm me angazhimet dhe detyrimet qeveritare të Kryeministrit dhe anëtarëve të Kabinetit qeveritar,” tha Fuga.

“Puna e tyre i shërben informimit të publikut dhe qytetarëve përmes rrjeteve sociale lidhur me aktivitetin qeveritar, e jo atë personal apo politik/partiak të Ministrave…,” shtoi ai.

Related articles

LEAVE A REPLY

Please enter your comment!
Please enter your name here

Stay Connected

0FansLike
0FollowersFollow
3,513FollowersFollow
3,572SubscribersSubscribe
spot_img

Latest posts