Shqipëria dhe Maqedonia e Veriut do të kenë një Task-Forcë të përbashkët që do të veprojë në fushën e sigurisë.
Komisioni për Sigurinë Kombëtare miratoi në parim projektligjin ndërsa zëvendësministri i Brendshëm Andi Mahila u shpreh se do të ndërmerren të gjithë hapat e nevojshëm për zbatimin e tij.
“Në parim do të thoja që shkëmbimi i të dhënave do të kryehet me ato sisteme dhe me atë mënyrë që përcaktohet në bazën ligjore të vendit përkatës.”
Mahila tha se qëllimi i marrëveshjes është që të shkëmbehen të dhënat personale në përputhje me legjislacionet kombëtare përkatëse mes dy vendeve.
“Do të synojnë thellimin e bashkëpunimit të drejtëpëdrejtë ndërmjet autoriteteve kompetente të palëve për të shqyrtuar taktikat, përgatitjen dhe kohën për zgjidhjen e çështjeve që dalin gjatë bashkëpunimit të ndërsjelltë si dhe për të vendosur kur dhe si do të ndërmerren veprimet në territoret e shteteve palë për të shkëmbyer informacione për raste të veçanta bashkëpunimi.”
Marrëveshja u firmos nga Ministrat e Brendshëm të Shqipërisë dhe Maqedonisë së Veriut në mbledhjen e zhvilluar mes dy qeverive me 14 nëntor të vitit 2022.