Pas konferencës për shtyp, ku deputeti socialist Taulant Balla pranoi njohjen me shtetasin Edmond Bego, të arrestuar në Greqi, nënkryetar i PD, Edi Paloka deklaroi se pavarësisht njohjes, Balla nuk tregoi se çfarë e lidh me këtë shtetas.
Paloka: Çfarë e lidh atë me një trafikant ndërkombëtar droge, pasuria e të cilit është shumëfishuar që nga lidhja e miqësisë me Taulant Ballën. Taulant Balla duhet të sfidojë Prokurorinë dhe Policinë për të hetuar dhe sqaruar shqiptarët, nëse pasuria e trafikantit biznesmen është shtuar këto dy vjet me ndikimin dhe ndërhyrjen e Taulant Ballës.
Paloka reagoi edhe pas deklaratës së Ballës për deputetin tjetër socialist Jurgis Çyrbja, duke thënë se Prokuroria nuk mund të japë informacione zyrtare, duke i quajtur deklaratat e Ballës si gënjeshtra.
Paloka: Prokuroria nuk mund të japë zyrtarisht, siç tha Balla, asnjë informacion për persona nën hetim. Sot prokuroria ka rastin të sakrifikojë diçka nga përkushtimi politik dhe të japë përgjigje, nëse e ka informuar apo jo Taulant Ballën për Jurgis Çyrbjen.
Çdo heshtje e Prokurorisë për këtë çështje sipas Palokës, është përfshirje në afera.