Demokratët thonë se qeveria ka prishur traditën e 5 viteve të fundit, ku opozita ka qenë institucionalisht e pranishme në mbledhje vjetore të këshillit të stabilizim-asociimit Shqipëri-Bashkim Evropian. Shqetësimi u ngrit në komisionin e Integrimit.
Tabaku: E kuptoj që ndoshta nuk doni që çështja e krimit, drogës dhe korrupsionit të bëhen tema diskutimi në tryezat e diskutimit ndërkombëtar, por zërin dhe fjalën e opozitës nuk e heq dot askush.
Përveç sqarimeve nga qeveria, opozita kërkon edhe që përfshirja e opozitës në përfaqësimin para BE-së të kthehet në një detyrim ligjor.
Tabaku: Kërkojmë që ne si komision të angazhohemi që sa herë që ka mundësi për tryeza të tilla diskutimi, opozita të jetë e përfaqësuar pavarësisht se kush është në opozitë. Në këtë proces të gjitha palët janë njësoj.
Deputeti I Partisë Socialiste Blendi Çuçi, tha se politika duhet të fokusohet tek mesazhet që tha Brukseli, ndërsa mbështeti idenë e opozitës që për formati e përfaqësimit, në komision të raportojë ministri i Integrimit.
Çuçi: Është një çështje që normalisht mund t’i kërkojmë informacion ministrit të Jashtëm, i cili është edhe ministër integrimi në këtë mandat.