Ashtu siç pritej Komisioni i Apelit të UEFA-s ka lënë në fuqi dënimin me 10 vite përjashtim nga kompeticionet europiane të Skënderbeut dhe gjobën prej 1 milion euro.
Pak ditë më parë u mbajt seanca në Nion të Zvicrës, por siç e pati paralajmëruar klubi korçar vendimi nuk ka ndryshuar.
Tashmë pritet që “Skënderbeu” ta dërgojë çështjen në KAS, Gjykata e Arbitrazhit Sportiv.
Pak ditë më parë gjatë seancës në Apel nga klubi korçar dëshmuan presidenti Ardjan Takaj, por edhe futbollistët Sabien Lilaj dhe Bakari Nimaga.
Gjithashtu edhe ish- lojtarët e klubit korçar Bledi Shkëmbi, sot trajneri i Lirisë së Prizrenit, Bernard Berisha, lojtar i Groznit në kampionatin rus, si dhe Liridon Latifi, sot lojtar i Akademisë Pushkash në Hungari.
Pas rreth 6 orë pyetjesh dhe përballje faktesh, paraqitja e përfaqësuesve të Skënderbeut përballë Komisionit të Apelit të UEFA-s përfundoi më 26 prill.
Tashmë “Skënderbeu” është drejtuar me sytë nga KAS, aty ku pak javë më parë fitoi edhe titullin kampion të vitit 2016, i hequr nga Federata Shqiptare e Futbollit./m.sh/noa.al/