Marjusi, dhe Admiri, janë dy të rinjtë shqiptarë që humbën jetën mes rrënojave të urës Morandi në Xhenova të Italisë. Gati 200 metra të kësaj ure mbi 1100 metra të gjatë u shemb mesditën e 14 gushtit duke shkaktuar deri tani 39 viktima.
Djaloshi 28 vjeçar Marjus Djerri dhe Admir Bokrina, 32 vjeçari nga Shkodra ishin në furgonin e punës dhe në momentin e tragjedisë po udhëtonin për të punuar drejt komunës Rapallo kur makina e tyre si dhjetra makina të tjera u rrëzuan nga një lartësi prej 45 metrash kur ura u shemb.
“Ministria e Jashtme italiane dhe Ministria e Brendshme italiane i konfirmuan Ambasades shqiptare ne Rome vdekjen e dy shtetasve shqiptare ne aksidentin tragjik te Genovas. Pas kontakteve me spitalin e Genovas dhe familjaret, Ambasada konfirmon se viktimat jane shtetasit shqiptare Marijus Djerri dhe Admir Bokrina. Ambasadorja Anila Bitri ne bisedat telefonike me te afermit e dy viktimave ngushelloi familiaret dhe u ofroi mbeshtetjen e shtetit shqiptar ne kete çast të rëndë” njoftoi ambasada shqiptare në Itali.
Telefonatat qe s’moren kurrë përgjigje
Me të mësuar në media tragjedinë familjarët e Marjusi por dhe të Admirit ishin përpjekur të kontaktonin në telefon me djemtë por kurrë nuk morën përgjigje nga ana tjetër e telefonit.
Ndryshe nga celulari i Admirit i cili rezultonte i fikur, ai i Marjus Djerrit – sipas dëshmive të familjareve të shkodranit – edhe 2 orë pas tragjedisë kishte qënë i ndezur dhe zilja binte.
Mbrëmjen e djeshme familjarët e Marjusit kishin deklaruar zhdukjen e tij dhe ishin mes njerëzve që ishin grumbulluar në spitalin San Martino të Genovas për të mësuar për fatin e njerëzve të tyre. Ndërsa prindërit e Admirit ndodheshin në Shkodër. Kishin ardhur 10 më parë me pushime.
Përfaqimi i fundit
Admiri kishte 3 vite që ishte martuar me Selmën dhe një ditë përpara tragjedisë kishin festuar këtë përvjetor. Ndërsa përqafimi i fundit kisht qenë në orën 11: 10 minuta kur kishte lënë banesën për të shkuar në punë pa ditur se nuk do të kthehej kurrë më.
(Ne foto:Në të majtë Marjus Djerri, nga Durrësi dhe në të djathtë Edi Bokrina, nga Shkodra)
Admir Bukrina ishte sipërmarrës e një shoqërie të vogël ndërtimi. Bisnesi i tij rezulton i regjistruar e si pronar i vetëm prej 5 dhjetorit të vitit 2016. Ndërsa Mariusi kishte pasion futbollin. Prej vitit 2015 luante në rolin e sulmuesit në skuadrën amatoriale Black Out të provincës së Genovas. Sic e dëshmon dhe skeda e tij si lojtar, gjatë sezonit 2016-2017 Marjus kishte shënuar 10 gola me skuadrën e tij.
Lidhjet e gjakut
Të dy familjet jetonin prej vitesh në Itali por ktheheshin shpesh në Shqipëri për të takuar njerëzit e tyre të cilët sot kanë hapur dyert e mortit.
Ne Shijak dyert e mortit i kanë hapur gjysherit e Marjusit ndërsa në Oblikë shtëpinë për të pritur ngushëllimet e ka hapur xhaxhai.