Presidenti i Republikës, Ilir Meta, gjatë qëndrimit në Nju Jork, priti në një takim të veçantë Presidentin dhe themeluesin e Fondacionit Ndërkombëtar hebre “Raoul Ëallenberg”, zotin Baruch Tenembaum, së bashku me anëtarë të tjerë të këtij Fondacioni.
Meta vlerësoi nismën e zotit Tenembaum dhe të Fondacionit Ndërkombëtar “Raoul Wallenberg” për ta deklaruar Shqipërinë si “Shtëpinë e Jetës”, në respekt të kontributit që populli shqiptar dhe Shqipëria kanë dhënë për mbrojtjen dhe strehimin e një numri të madh hebrenjsh gjatë Holokaustit.
Presidenti Meta mbështeti idenë e organizimit në Tiranë të një ceremonie të veçantë për këtë qëllim dhe vendosjen e një pllakate në nderim të kontributit të popullit shqiptar.
Duke u ndalur në marrëdhëniet historike e tradicionale midis shqiptarëve dhe hebrenjve, Meta nënvizoi se: “Ishte kjo miqësi, si dhe kodi shqiptar i Besës, që bënë që gjatë Holokaustit, numri i hebrenjve në Shqipëri të shumëfishohej dhe për këtë ne shqiptarët jemi krenarë”.
“Asnjë hebre nuk iu dorëzua nazistëve dhe tragjedi të tilla të së kaluarës me hebrenjtë, apo edhe ato etnike të ndodhura në rajonin e Ballkanit, nuk duhet të përsëriten. Kurrë më!”, – nënvizoi Presidenti Meta.
Nga ana e tij, Tenembaum e falënderoi Presidentin Meta për mbështetjen në realizimin e këtij projekti, si dhe nënvizoi mirënjohjen e thellë të hebrenjve për rolin që kanë luajtur shqiptarët gjatë Holokaustit.