Dy shqiptarë të akuzuar për trafik emigrantësh me gomone nga Franca në Angli përmes kanalit të La Manshit janë dënuar sot me nga 8 vite burg në Angli.
Sipas mediave angleze, dy shqiptarët Xhemal Baco dhe Feim Vata u arrestuan me 20 tetor të këtij viti, ndërsa sot janë njohur zyrtarisht me vendimin. Mësohet se Baco ka trafikuar 6 shqiptarë nga Franca drejt Anglisë, ndërsa rezultonte si drejtuesi i gomones dhe më pas Feim Vata pas mbërritjes në tokën angleze i transportonte emigrantët përmes furgonit.
Sipas policisë, të dy shqiptarët në bashkëpunim kishin kryer të paktën tre udhëtime me gomonen duke rrezikuar seriozisht jetën e tyre dhe të emigrantëve.
Prokurori i çështjes, Daniel Fugallo deklaroi se: “Sikur dikush të binte nga gomonia, ata nuk do të kishin mbijetuar gjatë në Kanalin e Anglisë”.
Për këtë rast ka folur edhe gjykatësi Simon James, i cili veprimin e shqiptarëve e quajti një krim të organizuar, që synon të trafikojë njerëz të dëshpëruar.
“Ky ishte krimi i organizuar dhe profesional, i projektuar posaçërisht për të shfrytëzuar njerëz të dëshpëruar duke rrezikuar jetën e tyre”, tha ai.