Komunistët dhe ithtarët e diktatorit janë shfaqur edhe këtë vit me pankarta dhe thirrje pro Enver Hoxhës në Varrezat e Dëshmorëve të Kombit. Të mbledhur bashkë, ata kanë bërë homazhe me fotot e Enverit në duar dhe me simbolet e komunizmit. Gjatë fjalës së tij kryetari i komunistëve ka reaguar ashpër kundër vendimit të qeverisë për rikthimin e eshtrave të Mid’hat Frashërit. Ai e ka cilësuar qeverinë e Ramës si neoballiste, pasi sipas tij Mid’hat Frashëri është tradhtar i vendit, ndërsa socialistët e rehabilituan.
“Populli shqiptar nën udhëheqjen e Enver Hoxhës përballoi me heroizëm 15 divizione fashiste dhe naziste duke u shkaktuar 70 mijë të vrarë dhe dëme të pallogaritshme. Në këtë luftë dhëmbë për dhëmbë me fashistët dhe ballistët dhanë jetën dëshmorët e atdheut.
Populli shqiptar bëri luftë heroike për çlirimin e vendit me në krye gjeniun Enver Hoxha. Kjo luftë fitimtare e shpëtoi Shqipërinë. Në 14 nëntor 2018 populli shqiptar pa edhe dëgjoi ceremoninë për kthimin e eshtrave të Mid’hat Frashërit. Ky akt është shprehja e qartë e rehabilitimit të kolaboracionistit. Qeveria rilindase socialiste e Ramës është neoballiste. Poshtë qeveria neoballiste e Edi Ramës. Balli Kombëtar përfaqësonte interesat e borgjezisë. Balli Kombëtar zgjodhi bashkëpunimin me nazistët.
Dokumentet e nazi-fashitëve vërtetojnë kolaboracionizmin e Ballistëve dhe Zogistëve. Populli i ka paguar shtrenjtë krimet e mëdha të Ballit Kombëtar. Balli Kombëtar vrau 48 mijë dëshmorët e atdheut. Dëgjoi dhe shkrumboi Shqipërinë. Fajtori kryesor për këto krime është kryetari i Ballit Kombëtar Mid’hat Frashëri. Ishte dhe mbeti deri në fund tradhtari i vendit. I bëjmë thirrje popullit të ngrihet kundër qeverisë së Ramës dhe të distancohen nga socialistët” deklaroi kryetari i partisë Komuniste.