Në selinë e Partisë Demokratike për rreth një orë, aleatët e selisë blu kanë diskutuar mbi organizimin e protestës që do të zhvillohet paraditen e 18 dhjetorit para Parlamentit.
Në përfundim të takimit, kreu i opozitës Lulzim Basha nënvizoi se opozita është e bashkuar në këtë reagim, teksa shton se kryeministri Edi Rama po kërkon të vendosë një prokuror politik me qëllim që të mbyllë dosjet. Por për këtë Basha ka bërë dhe një paralajmërim.
Basha: Nëse nesër, Edi Rama tenton të çojë deri në fund puçin e tij kushtetues, duhet ta dijë se kostoja e përballjes do të jetë e madhe në kuptimin e goditjes që do t’i japë bashkëjetesës demokratike, stabilitetit në vend, dhe se shqiptarët si çdo komb tjetër i civilizuar nuk mund dhe nuk do ta pranojnë as dhunimin e Kushtetutës, as kapjen politike të drejtësisë.
Po ashtu Basha thekson se Rama po kërkon të asgjësojë Reformën në Drejtësi, veprim të cilin sipas tij shqiptarët nuk do ta pranojnë.
Basha: Shqiptarët mezi e presin për interesat e tyre si qytetarë por edhe për interesin madhor kombëtar të pastrimit të politikës nga krimi, pa të cilën nuk do të ketë as hapje negociatash, as Shqipëri europiane.
Edhe një herë Basha u bëri ftesë shqiptarëve.
Basha: Të gjithë të bashkohemi para Kuvendit të Shqipërisë, para Parlamentit në orën 9.30 kur do të nisë protesta popullore jashtë Kuvendit dhe protesta popullore brenda Kuvendit.
Në takimin në selinë e PD kanë marrë pjesë Fatmir Mediu i republikanëve, dash Shehi i LZHK, Nard Ndoka i PDK, dy kryetarët e Ballit Artur Roshi dhe Adriatik Alimadhi, kryetari e Aleancës Kuq e Zi etj. Ndërsa ka munguar kreyetari i PAA Agron Duka dhe i PBDNJ Vangjel Dule.
Deklarata e plotë e Lulzim Bashës
Siç e keni marrë vesh, mbledhja e tryezës së bashkuar të opozitës ka përfunduar me një vendimarrje unanime. Opozita është e bashkuar dhe e vendosur për protestën e së nesërmes, protest e cila do të zhvillohet brenda dhe jashtë sallës së Kuvendit, nga opozita parlamentare dhe nga qytetarët e bashkuar për të kundërshtuar me çdo formë dhe mjet demokratik puçin kushtetues që Edi Rama do të vërë në jetë nesër.
Interesi i Edi Ramës është dhe vetëm një; të shpëtojë Saimir Tahirin, për të shpëtuar lëkurën e tij. Të mbyllë dosjet e korrupsionit dhe hajdutërisë masive të ministrave të tij, të ndihmojë narkotrafikantët që kanë rënë në rrjetën e Krimeve të Rënda apo në rrjetat e Antimafias dhe institucioneve ndërkombëtare të ligjzbatimit, të pengojë me çdo kusht nisjen e pastrimit të madh të politikës nga krimi përmes Reformës në Drejtësi.
Nesër Edi Rama ka dy qëllime. Duke dhunuar Kushtetutën të emërojë një prokuror politik. Duke emëruar një prokuror politik, të pengojë, të ngadalësojë apo të asgjesojë dosjet e krimit dhe korrupsionit që lidhin bashkëpunëtorët e tij të ngushtë me krimin dhe me atë vetë.
Në këto kushte, shqiptarët kanë të vetme zgjedhje, që mund të ketë çdo popull i civilizuar kur Kushtetuta, pakti që ndaj të mirën nga e keqja, politikën demokratike nga diktatura, dhunohet dhe shkelet, dhe kjo është të bashkohemi për të treguar që ky vend ka institucionin e opozitës në këmbë, ka qytetarët e lirë në këmbë për të mbrojtur liritë themelore.
Nëse nesër, Edi Rama tenton të çojë deri në fund puçin e tij kushtetues, duhet ta dijë se kostoja e përballjes do të jetë e madhe në kuptimin e goditjes që do t’i japë bashkëjetesës demokratike, stabilitetit në vend, dhe se shqiptarët si çdo komb tjetër i civilizuar nuk mund dhe nuk do ta pranojnë as dhunimin e Kushtetutës, as kapjen politike të drejtësisë, as asgjesimin e Refomës në Drejtësi për të cilën kemi investuar kaq shumë dhe që shqiptarët mezi e presin për interesat e tyre si qytetarë por edhe për interesin madhor kombëtar të pastrimit të politikës nga krimi, pa të cilën nuk do të ketë as hapje negociatash, as Shqipëri europiane.
Pra, nesër bashkohemi për këto qëllime të mëdha që i ndajnë kombet e civilizuara nga kombet e robëruara. Për të mbrojtur Kushtetutën, për të mbrojtur drejtësinë nga kapja politike, për të mbrojtur Reformën në Drejtësi.
Reagimi i qytetarëve në këto 24 orë të organizimit opozitar është i jashtëzakonshëm ndaj dua t’i ftoj të gjithë ata që duan me të vërtetë demokraci, duan reformën në drejtësi, duan të kenë të garantuara kushtet për të jetuar këtu dhe jo një Shqipëri që rrënohet ditë për ditë dhe e bën të pamundur për të ndershmin, për njeriun me integritet, me talent, të jetojë në Shqipëri port ë largohet si refugjat, të gjithë të bashkohemi para Kuvendit të Shqipërisë, para Parlamentit në orën 9.30 kur do të nisë protesta popullore jashtë Kuvendit dhe protesta popullore brenda Kuvendit.
Ju ftoj të jemi të gjithë së bashku pavarësisht bindjeve politike. Ajo që na bashkon si shqiptarë dhe si europianë është mbrojtja e Kushtetutës, drejtësia e pakapur politikisht, dhe mbrotja e Refomës në Drejtësi si e vetmja garanci për një Shqipëri europiane.