Shkencëtarët italianë janë shumë pranë identifikimit të trupit që besohet të jetë i Gai Plini Sekundit, shkrimtari, biologu dhe komandant në ushtrinë romake.
Plini plak kujtohet për veprimin e tij të guximshëm e urdhërimit të flotës së tij detare në një mision shpëtimi në Pompei, rreth 2 mijë vjet më parë kur shpërtheu vullkani në malin Vesuvius.
Eshtrat i përkasin një personi që vjen nga shtresa e lartë në Romën antike pasi pranë tyre janë gjetur bizhuteri të çmuara, shkruan newsbomb.al.
Nëse shkencëtarët italianë ia dalin me sukses, ky do jetë identifikimi i parë pozitiv i një figure të lartë të Romës antike, një njeri i cili humbi jetën e tij teksa udhëhoqi operacionin e parë të madh të kërkim-shpëtimit, dhe gjithashtu shkroi një nga enciklopeditë e para të njerëzimit.
Gaius Plinius Secundus, i njohur si Plini plak ishte admirali i flotës perandorake romake e ankoruar në Misenum, në veri të Napolit, në vitin 79 kur shpërtheu vullkani Vesuvius.
Sipas nipit të tij Plini i ri, i cili ishte dëshmitar okular i shpërthimit të vullkanit, por zgjodhi të mos shkonte me flotën, Plini plak mund të ketë vdekur nga thithja e gazrave toksikë të lëshuar nga vullkani, dhe trupi i tij është lënë pas.