Një ditë pasi kundërshtari politik e linçoi publikisht në Kuvend për gjuhë të ashpër dhe fyese, kryeministri Rama pranon se gjuha kriminalizuese e politikës inkurajon elementët me prirje kriminale dhe barbare.
Në një konferencë për mediat, Rama thotë se kjo është një çështje kulturore që nuk adresohet dhe nuk zgjidhet sa hap e mbyll sytë.
Rama: Unë mendoj që politika me gjuhën e saj, akuzat e saj, kur them politika kam parasysh atë burim të pasur të këtij pisllëku gjuhësor dhe jo të gjithë, kontribuon në ushqimin e një klime psikologjike të rënduar dhe është një përgjegjësi jashtëzakonisht e madhe ta bësh këtë. Ashtu sikundër qysh në kohën e Romës, civilizimit romak është përcaktuar vija ndarëse mes akuzuesve dhe të akuzuarve.
Është barra e atij që akuzon të provojë akuzat nuk është barra e të akuzuarit të provojë se akuzat nuk janë të vërteta. Por barbaria e trashëguar nga regjimi komunist dhe jo vetëm por sidomos nga regjimi komunist që ishte hapësira ku u rrit një popull i tërë dhe posaçërisht e gjithë gjenerata e politikës së këtyre 30 viteve me asnjë ide për ekzistencën e të ndryshmit, rivalit, kundërshtarit në ide por vetëm me idenë që kush mendon ndryshe, flet ndryshe, dhe mban qëndrim të ndryshëm është armik i cili duhet pushkatuar, burgosur, linçuar publikisht vazhdon ende të ketë bishtat e vet edhe në ditët e sotme.
Është një çështje kulturore që nuk adresohet dhe nuk zgjidhet sa hap e mbyll sytë, kërkon vite. E shohim dhe sot, e kemi para syve dhe ju të gjithë jeni të detyruar ta pasqyroni gjithë këtë furi të gjuhës të kohëve të vjetra që riprodhohet për arsyet dhe mosarsyet e politikës së ditës. Dhe kur shikon në të gjithë ekranet fantazmat e të shkuarës që flasin me gjuhën ekstreme apo dhe pasqyrën e parlamentit të Shqipërisë ku për fat të keq nuk mungojnë ekstremet në akuza të natyrës penale, gjuha kriminalizuese për tjetrin është e kuptueshme që mesazhi që marrin shtresa të ndryshme të shoqërisë dhe mesazhi që marrin edhe këta elementë me prirje kriminale dhe barbare në shoqëri është inkurajuese patjetër, fatkeqësisht.
